Studentët masovisht kundër Dik Martit

Rreth 500 persona kanë nënshkruar peticionin kundër raportit të Dik Martit, në ditën e parë të aksionit për grumbullimin e nënshkrimeve në Maqedoni. Për momentin aksioni zhvillohet vetëm në hapësirat e Universitetit Shtetëror të Tetovës, kurse organizatorët shprehen të kënaqur nga jehona në ditën e parë, duke pasur parasysh se në këtë periudhë është sezoni i provimeve.

"Jehona është në nivel duke marrë parasysh se tani ka afat të provimeve dhe studentët përgatiten nëpër shtëpi", deklaroi Shaban Arsllani, kryetar i Parlamentit Studentor pranë USHT-së

"Të mos kemi iluzione se në të ardhmen nuk do të ketë provokime tjera, nga njerëz të cilët ashiqare paguhen prej dikujt. Mirëpo ne shqiptarët duhet të japim përgjigje adekuate ndaj këtyre provokimeve", deklaroi një qytetar, pasi e nënshkroi peticionin.

Pas arritjes së materialeve plotësuese në ditët në vijim aksioni do të zgjerohet edhe në qytete tjera të banuara me shqiptarë. Aksioni do të zgjasë deri në fund të kësaj jave, por nëse ka nevojë do të vazhdojë edhe javën e ardhshme. Organizatorët presin që gjatë këtij aksioni në Maqedoni të grumbullohen 30 deri 50 mijë nënshkrime.