Edhe pas15 vjetëve autorët e atentatit ndaj Gligorovit mbeten në liri

15 vjet pas atentatit ndaj Kiro Gligorovit, ende asnjë rezultat konkret rreth atentatorëve apo porositësve të tij. Ish ministri i brendshëm Lube Boshkovski deklaron se rasti nuk është zgjidhur për shkak se vetë viktima e atentatit nuk ka dashur një gjë të tillë. Ndërkohë kryetari i partisë Lëvizja popullore Maqedonase, deklaron se rasti është mbyllur që para 11 vjetësh.
“Gjatë asaj kohe, prokuror publik ishte zoti Stavre Gjikov. Gjatë komunikimit mes meje dhe zotit Gjikov, ai tha se zoti Glogorov është i gatshëm ta nënshkruaj procesverbalin dhe me këtë të filloj hetimi i plotë për autorët apo për porositësit e atij atentati, të cilët janë nga këtu, nga Republika e Maqedonisë. Disa prej tyre akoma kanë guximin që të mbajnë funksione të larta shtetërore. Gjithë çështja mbeti te zoti Gligorov. Në pyetjen time para shkuarjes time në Hagë, përgjigjja e tij ishte se ai ka familje dhe se nuk dëshiron ta firmos atë procesverbal”, deklaroi Lube Boshkovski, kryetar i partisë ‘Të Bashkuar për Maqedoninë’.
“Në mënyrë konkrete do t’i dëshmojmë opinionit se ajo që është thënë nga MPB-ja në 11 vitet e kaluara, se punohet rreth atentatit është një hiç i madh dhe një gënjeshtër e manipulim i qytetarëve. Ky është një dokument nga kreu i MPB-së drejtuar të gjitha njësiteve organizative të shërbimeve sekret të Maqedonisë dhe policisë kriminale. Në këtë dokument qartë shihet. “Citoj” ju njoftojmë se shtabi i aksionit operativ ‘automobil”, në selinë e MPB-së nuk ekziston më si njësi organizative”. Përsërisë, shtabi i aksionit operativ me këtë telegram ndërpritet”, theksoi Janko Bahçev, kryetar i partisë ‘Lëvizja Popullore e Maqedonisë’.
Këto deklarata i ka hedhur poshtë si të pabaza ministrja e brendshme Gordana Jankulovska, duke theksuar se rasti nuk është mbyllur dhe se dikasteri i saj është impenjuar seriozisht në zbardhjen e tij.
“Për fat të keq edhe pas 15 vjetësh që nga ndodhja e rastit, akoma nuk mund të themi se ka progres evident apo se është afër përfundimit të saj. MPB punon me intensitet të lartë dhe seriozisht në këtë rast, dhe çdo informatë e re që sigurojmë, e hetojmë atë. .... Ne i ndjekim edhe debatet publike ku nga arsye të ndryshme individët japin informata që vlerësojnë se mund të hedhin dritë të re në hetime, ato i analizojmë dhe përderisa vërtetohet se mund të ndihmojnë sigurisht se do të vihen në hetimin e mëtejshëm”, kundërpërgjigjet Gordana Jankullovska, ministre e brendshme e Maqedonisë.
Debatet për rastin e Gligorovit, u rihapën disa ditë më parë në një panel diskutimi mes ish zyrtarë e ish gazetarë. Atentati ndodhi plot 15 vjet më parë, në 3 tetor të 1995.