Shkarkimi nuk e befason Ancelottin

Menaxheri i Chelseas, Carlo Ancelotti ka thënë se nuk do të ishte i befasuar nëse Roman Abramovich vendos ta shkarkojë pas periudhës së rezultateve negative. Ancelotti po ashtu beson se Chelsea më nuk është në gjendje të mbrojë titullin në Premierligë, pasi gjenden nëntë pikë prapa Manchester Unitedit me një ndeshje më tepër të luajtur.

Por, trajneri italian i shpjegoi marrëdhëniet e tij të afërta me pronarin e Chelseas, Abramovich, diçka që i ka lejuar atij të marrë frymë më lirshëm, edhe pse ekipi ka rënë në pozitën e pestë në tabelë.

“Nuk do të befasohem nëse e humb punën, sepse ky është futbolli. Për disa njerëz është befasi që ende jam këtu. Por, kam marrëdhënie shumë të afërta me pronarin dhe kjo është gjithmonë e rëndësishme. Kjo ndihmon në këto situata kur njerëzit e tjerë dyshojnë te ju. Mendoj se ne duhet të shikojmë dhe të ballafaqohemi me realitetin e ai është se ka kaluar një periudhë e gjatë prej kur kemi marrë një rezultat të mirë”, tha Ancelotti për Sunday Mirror.

“Më duhet të ruaj marrëdhëniet e mira me pronarin. Nuk e di sa trajnerë kanë qenë në gjendje të vazhdojnë drejtimin e ekipit me rezultate të këtilla pa u shkarkuar, por përsëri pronari ka përkrahur punën time dhe e ndjej këtë, sepse kam biseduar me të. Nuk kam pritur një moment si ky, kam pritur një punë të vështirë, por jo kaq të gjatë dhe të vështirë si kjo”, shtoi ai.

I pyetur nëse duhet të fitojë përsëri FA Cupën për të mbetur në detyrë, Ancelotti tha: “Vërtet, nuk e di. Për të mbajtur punën këtu, rezultatet janë të rëndësishme, por po ashtu duhet të luajmë mirë. Nuk e di nëse do të më kushtonte me punë nëse nuk do të fitoja Premierligën vitin e kaluar. Mendoj se ekipi luajti shkëlqyeshëm, futboll sulmues”. Ancelotti ka insistuar se asnjë futbollist nuk e ka vendin e sigurt në përpjekje për të përmirësuar situatën.

“Këtu nuk ka asnjë futbollist të paprekshëm. Drogba mungoi kundër Tottenhamit, Anelka mungoi sepse përpara kishim mundësi të ndryshonim diçka, ndërsa është më e vështirë të ndryshojmë diçka në mbrojtje. Janë disa futbollistë që në këtë periudhë e shfrytëzojnë personalitetin e tyre, karakterin e përvojën për të ndihmuar të tjerët të shkojmë përpara. Por, nuk ka futbollistë të paprekshëm, nëse mendoj se e meritojnë të luajnë, ata do të luajnë”, përfundoi Ancelotti.