BNJVL-ja hap zyre në Bruksel, Gruevskit nuk i presin gërshërët

Kryeministri Gruevski inauguroi me shumë vështirësi, zyrën e re në Bruksel të përfaqësimit të Bashkësisë së Njësive të Vetë-Qeverisjes Lokale të Maqedonisë. Ceremoninë e hapi zyrtarisht kryetari i Komunës së Shkupit dhe BNJVL-së, Koce Trajanovski, e në të morën pjesë shumë kryetarë të komunave të tjera të vendit.
“Funksioni i kësaj zyre është që 85 komunat e Maqedonisë të jenë më afër Unionit Evropian dhe më afër informatave e praktikave evropiane si dhe më afër fondeve të BE-së, e gjitha kjo në funksion të realizimit të projekteve në interes të qytetarëve. Buxheti i kësaj zyre do të mbulohet 50 për qind nga Qyteti i Shkupit dhe 50 për qind nga BNJVL-ja, dhe vitin e parë nuk do jetë shumë i ngarkuar pasi parashikon rreth 7 mijë euro qira dhe vetëm një punonjës” , deklaroi Izet Mexhiti, zv/Kryetar i BNJVL-së dhe kryetar i Komunës së Çairit.
E megjithatë, vlen të theksohet se për këtë zyrë modeste me buxhet tepër modest, salla e vogël dhe e ngushtë e ceremonisë ishte mbushur me kryetarë komunash nga Maqedonia, anëtarë të qeverisë, përfaqësues të misionit të vendit në BE dhe gazetarë, dhe vetëm pak të huaj. Ndërsa shtrëngimi i duarve të kryetarëve të komunave të Maqedonisë me Kryeministrin Gruevski me një llogari të thjeshtë i ka kushtuar taksapaguesve shumë më shumë se i gjithë buxheti vjetor i zyrës duke përllogaritur vetëm çmimin e biletave të avionit dhe atë të akomodimit në Bruksel për këtë ceremoni.