Policia e Kosovës vlerëson se procesi zgjedhor i 9 janarit nga aspekti i sigurisë vlerësohet i qetë, pavarësisht disa informacioneve, incidenteve të izoluara që janë raportuar e që nuk kanë ndikuar në mbarëvajtjen e procesit zgjedhor.
Në njoftim thuhet se lidhur me procesin zgjedhor që është mbajtur të dielën Policia e Kosovës paraprakisht kishte përgatitur planet operative policore për menaxhimin e situatës së sigurisë gjate këtij procesi, duke angazhuar mbi 900 zyrtarë policorë në realizimin e këtij plani.
“Qëllimi i këtij plani ka qenë ruajtja e rendit dhe qetësisë publike, siguria në nivel të vendit me fokus të veçantë angazhimet specifike rreth procesit të zgjedhjeve me qëllim krijimin e një klime të qetë dhe të sigurt për gjithë qytetarët që shfrytëzojnë të drejtën e votimit dhe përcjelljen e materialit zgjedhor”, thuhet në njoftim.
Realizimi i planit policor ka filluar në orët e hershme të mëngjesit të së dielës, duke ofruar siguri në 62 qendra votimi dhe 185 vendvotime në komunat Skenderaj, Drenas e Deçan dhe në nga një vendvotim në Lipjan e Malishevë.
Ndër incidentet që raportohen nga policia është ai në Komoran, të Drenasit, rreth orës 10:30 zyrtarët policor kanë pranuar një informacion rreth një mosmarrëveshje, ku 5 vëzhgues të një subjekti politik kanë tentuar të hyjnë brenda në qendër të vendvotimit mirëpo të njëjtit sipas komisionarëve nuk kanë qene në listën e asaj qendre të vendvotimit.
“Me kërkesë të komisionerëve është kërkuar nga zyrtarët policor që të bëhet identifikimi i tyre dhe me pas të njëjtit nga personat kompetent të KQZ-së janë udhëzuar për veprime të mëtutjeshme në KKZ”, thuhet në njoftim.
Edhe në Prekaz të Epërm, të Skenderaj zyrtarët policor janë informuar se një vëzhgues i një subjekti politik është sulmuar fizikisht (goditur me shuplake) nga një vëzhgues i një subjekti tjetër politik.
Zyrtarët policor thonë se kanë intervenuar menjëherë në vendngjarje dhe kanë qetësuar situatën, ku inicimi i rastit ka mbet të realizohet pas përfundimit të procesit zgjedhor.