Studentët ankohen se në vend të profesorëve, atyre iu ligjërojnë asistentët e atyre lëndëve profesorët e të cilave ligjërojnë edhe në Universitetet tjera përveç atij amë, në të cilin janë të punësuar të rregullt. Zëdhënësi i Universitetit Shtetëror të Tetovës (USHT), Selam Sulejmani thotë se ata profesor që punojnë edhe në Universitetet tjera përveç në USHT kanë nënshkruar kontratë dhe marrëveshje me Universitetin amë dhe aty përcaktohet orari i ligjërimit. “Profesorët nuk mungojnë në ligjërata sepse me ligj ata kanë nënshkruar kontratë dhe marrëveshje me të gjitha universitetet ku punojnë në mënyrë që të përcaktohet orari me qëllim që të mos mungojë profesori në ligjërim”, tha Sulejmani. Ndërkaq nga ana tjetër studentët thonë se përqindjen më të madhe të ligjëratave e mbajnë me asistentët sesa me profesorët. “Më shumë i mbajmë ligjëratat me asistentët e lëndës se sa me vetë profesorët. Asistentët janë për t’i mbajtur ushtrimet e jo ligjëratat, por profesorët janë të zënë në universitetet tjera andaj edhe shumicën e kohës ata zëvendësohen nga asistentët”, tha një student. Edhe pse tentuam, nuk arritëm që të marrin prononcim edhe nga Universiteti i Evropës Juglindore (UEJL) sa i përket kësaj çështjeje, ku edhe aty ka një numër të madh të profesorëve që ligjërojnë edhe në Universitete tjera. Kurse ministri i arsimit dhe shkencës, Nikolla Todorov kohë më parë paralajmëroji se do të dërgohen inspektorë në Universitete me qëllim që të verifikohet se a janë profesorët prezent në ligjërata apo jo dhe ata profesor të cilët nuk e kryejnë detyrën do të ballafaqohen me sanksionim të cilin do ta caktojë MASH-i.