Shitblerja e mallrave dhe prodhimeve nëpërmjet internetit në 10 muajt e parë të vitit të kaluar ka arritur shifrat prej 65 mijë euro apo 1 % nga transakcionet e realizuara bankare në vitin 2010, ndërsa blerja e prodhimeve nga interneti nga shtetet e jashtme është për 20 herë më e lartë. Në analizën e prezantuar nga USAID-i thuhet se, problem kryesor për situatën e tillë, është frika e qytetarëve për keqpërdorimin e të dhënave personale të tyre nëse blejnë përmes internetit, ndërsa ndikim në nivelin e ulët të tregtisë kanë edhe provizionet e larta që duhet të paguhen nga vetë blerësi.
“Për fat të keq provizionet për pagesa përmes internetit janë ende të larta, kjo vjen si situatë e sasisë së ulët të transaksioneve që realizohen brenda vitit” tha Darko Janevski, përfaqësues i USAID-it.
Sipas ministrit për Shoqëri informatike dhe administratë Ivo Ivanovski, Qeveria po i ndërmerr të gjitha masat e duhura për lehtësimin e procedurave për blerjen e prodhimeve përmes internertit.
“Nga Banka Popullore është rritur limiti për importin e fondeve dhe mallrave të ndryshme, sepse më herët për një vlerë të ulët kërkohej dërgesa e një formulari deri te BPM-ja. Në përgjithësi, tregtia elektronike në Maqedoni mund të funksionoj pa kurrfarë problem” tha Ivo Ivanovski, ministër për shoqëri informatike dhe administrate.
Ndërsa nga kompania ‘Kasis’ e cila kujdeset për sigurinë e transaksioneve në internet, thonë se deri më tani në Maqedoni nuk ka pasur keqpërdorimeve të kartelave kreditore.
“Deri më tani nuk kemi asnjë rast të keqpërdorimit të kartelave, edhe pse ka tentime por, keqpërdorime nuk kemi pasur” tha Sandra Tomanoviq, drejtoreshë e biznesit në kompaninë ‘Kasis’.
Sipas analizës së prezantuar, Maqedonisë ende i mungon sistem për pagesë në mënyrë elektronike i ngjashëm me ato të jashtme sikurse është Pay Pall, të cilët kanë paralajmëruar se do të hyjnë edhe në tregun e Maqedonisë.